ඉතිහාසගත වූ 11 හැවිරිදි ඔලිම්පික් ක්‍රීඩිකාව

මෙවර ඔලිම්පික් උලෙළ සඳහා සහභාගී වන ළාබාලතම පුද්ගලයා ලෙස චීනයේ 11 හැවිරිදි ස්කේට්බෝඩින් ක්‍රීඩිකාවක් ඉතිහාස ගත වුණා.

ඇය 11 හැවිරිදි වියේ පසුවන අතර ඇය උපත ලබා ඇත්තේ 2012 ලන්ඩන් ඔලිම්පික් උලෙළ නිම වීමට පෙර දිනයේදීයි.

Zheng Haohao සිය ස්කේට්බෝඩින් ඉසව්ව සඳහා ලකුණු 63.19 ලබාගනිමින් 18 වැනි ස්ථානය හිමිකර ගත්තා.

 

එංගලන්තයට යන ශ්‍රී ලංකා ටෙස්ට් සංචිතය

එංගලන්තට එරෙහිව ආරම්භ වීමට නියමිත තරග 03කින් යුත් ටෙස්ට් ක්‍රිකට් තරගාවලියට සහභාගී වන ශ්‍රී ලංකා සංචිතය අද (07) නම්කරනු ලැබුවා.

ශ්‍රී ලංකා ක්‍රිකට් ආයතනය පැවසුවේ, එම සංචිතය සඳහා ක්‍රීඩා අමාත්‍යවරයාගේ අනුමැතිය ලැබුණු බවයි.

එම සංචිතය පහතින්,

1) ධනංජය ද සිල්වා - නායක

2) දිමුත් කරුණාරත්න

3) නිශාන් මධුෂ්ක

4) පැතුම් නිස්සංක

5) කුසල් මෙන්ඩිස් - උප නායක

6) ඇන්ජලෝ මැතිව්ස්

7) දිනේෂ් චන්දිමාල්

8) කමිඳු මෙන්ඩිස්

9) සදීර සමරවික්‍රම

10) අසිත ප්‍රනාන්දු

11) විශ්ව ප්‍රනාන්දු

12) කසුන් රාජිත

13) ලහිරු කුමාර

14) නිසල තාරක

15) ප්‍රභාත් ජයසූරිය

16) රමේෂ් මෙන්ඩිස්

17) ජෙෆ්රි වැන්ඩර්සේ

18) මිලාන් රත්නායක

ක්ලබ් වසන්ත ඝාතනය - ලොකු පැටීගේ මස්සිනා කොටුවෙයි

 

කල්බ් වසන්ත ඝාතනයට ආධාර අනුබලදීමේ චෝදනාව යටතේ ඝාතනය මෙහෙයවූ ලොකු පැටීගේ මස්සිනා බස්නාහිර දකුණ අපරාධ කොට්ඨාසය මගින් අත්අඩංගුවට ගෙන අතුරුගිරිය පොලීසියට භාරදී තිබෙනවා.

සැකකරු ඊයේ (06) අත්අඩංගුවට ගෙන ඇත්තේ,  දක්ෂිණ අධිවේගී මාර්ගයේ සේවා පියසේදීයි.

ඔහු  දර්ගා නගරය ප්‍රදේශයේ පදිංචි 36 හැවිරිදි පුද්ගලයෙකු වන අතර වෙඩිතැබීම සිදුකළ වෙඩික්කරුවන්ට කුලී නිවසක් ලබාගැනීම හා අම්බලන්ගොඩ ප්‍රදේශයේ සිට වෙඩික්කරුවන් දෙදෙනා හා ආයුධ අතුරුගිරිය ප්‍රදේශයට රැගෙන යාමට කුලී වෑන් රථයක් සම්බන්ධ කරදීම ඔහු විසින් සිදුකර ඇති බව පොලීසිය සඳහන් කළා.

වෙඩික්කරුවන් දක්ෂිණ අධිවේගී මාර්ගය ඔස්සේ පළායෑමට භාවිත කළ බස් රථය කතරගම ප්‍රදේශයේ පුද්ගලයෙකුට විකුණා තිබියදී බස්නාහිර පළාත් දකුණ අපරාධ කොට්ඨාසයේ නිලධාරීන් විසින් සොයාගනු ලැබුවේ මෙම සැකකරුගෙන් සිදුකළ ප්‍රශ්න කිරීම් වලදී හෙළිවූ තොරතුරු මතයි.

ඝාතනය සිදුවූ දිනට පෙර එම බස් රථය ගමන් ගන්නා අයුරු දැක්වෙන CCTV දර්ශන පෙළක් ද විමර්ශන නිලධාරීන්ට හමුවී තිබුණා.

හෝටලයක සිටි 24 දෙනෙක් පණපිටින් පිළිස්සෙයි

 

අරගලකරුවන් විසින් හෝටලයකට ගිනිතැබීම නිසා එහි නවාතැන් ගෙන සිටි පුද්ගලයින් 24 දෙනෙකු මියයාමේ අවාසනාවන්ත පුවතක් බංග්ලාදේශයෙන් වාර්තා වී තිබෙනවා.

රැකියා කෝටා ක්‍රමයට එරෙහිව ආරම්භ වී ආණ්ඩු විරෝධී කැරැල්ලක් බවට පරිවර්ථනය වූ බංග්ලාදේශ විරෝධතා පසුගියදා අවසන් වූයේ අගමැතිනී ෂෙයික් හසීනා ඉල්ලා අස්වීමෙන් අනතුරුවයි.

ශිෂ්‍ය ක්‍රියාකාරීන්ගේ ඉල්ලීමකට අනුව එරට පාර්ලිමේන්තුව ද විසුරුවා හැරුණු අතර, හමුදා පාලනයෙන් තොර අන්තර්වාර රජයක් පත්කිරීමටත් කටයුතු කර තිබුණා.

ඒ අනුව නොබෙල් සාම ත්‍යාගලාභී 84 හැවිරිදි මොහමඩ් යුනුස් එරට අන්තර්වාර රජයේ ප්‍රධාන උපදේශකවරයා ලෙස පත් කෙරුණු අතර එම තීරණය ගෙන තිබුණේ ජනාධිපති මොහොමඩ් ෂහාබුද්දීන්, හමුදා ප්‍රධානීන් සහ ශිෂ්‍ය නායකයින් අතර ඇතිකරගත් එකඟතාවකට අනුවයි.

අගමැතිනිය ඉල්ලා අස්වුවද රටතුළ පවතින නොසන්සුන් තත්ත්වය තවමත් පහව ගොස් නැහැ.

අරගලකරුවන් ෂෙයික් හසීනාගේ අවාමි ලීගයේ නායකයෙකුට අයත් හෝටලකට ගිනි තැබීමෙන් ඒ තුළ සිටි පුද්ගලයින් 24 දෙනෙකු පණ පිටින් පිළිස්සී මියගොස් ඇති අතර ගින්නෙන් මියගිය බහුතරය එම හෝටලයේ ලැගුම්ගෙන සිටි පිරිසක්.

හින්දු වැසියන්ගේ නිවාස සහ දේවස්ථාන ඇතැම් ප්‍රචණ්ඩකාරී පිරිසගේ ප්‍රහාරයට ලක්වන අතර රටතුළ පවතින ගැටුම්කාරී වාතාවරණය මේ වන විට ජාතිවාදී ස්වරූපයක් ගෙන ඇත්තේ එරට වෙසෙන සුළුතර හින්දු ප්‍රජාව ඉලක්ක කරගනිමිනි.

බංග්ලාදේශ සුළුතර හින්දු ප්‍රජාව ඉස්ලාමීයයන්ගේ ඉලක්ක බවට පත්වූ පළමු අවස්ථාව මෙය නොවන අතර  1992 වසරේදී ඉස්ලාමීය දේවස්ථානයක් කඩාදැමීමේ සිද්ධියක් මුල්කරගෙන හින්දූන් රටින් පළවා හැරීමට බංග්ලාදේශ වැසියන් කටයුතු කර තිබුණා.

2013 - 2021 කාලය තුළ හින්දු ප්‍රජාව ඉලක්ක කර එල්ල වූ ප්‍රහාර ගණන 3,679කි.

බංග්ලාදේශයේ දෛනික කටයුතු මේ වනවිට අඩපණව ඇති අතර ශිෂ්‍ය ක්‍රියාකාරීන් මහා මාර්ගවල රථවාහන පාලන කටයුතු සිදුකෙරෙනු ලැබෙනවා.

පක්ෂය හැර ගිය අයට නාමල්ගෙන් ආරාධනාවක්

 

ජනාධිපතිවරණයට තරග කිරීමට සැලැස්මක් නොතිබුණත් අභියෝගාතාමක අවස්ථාවේ පක්‍ෂ කළ ඉල්ලීම භාරගත් බවත් පක්‍ෂය හැර ගිය පිරිසට ද නැවත පක්‍ෂයකට එක්වන ලෙස ආරාධනා කරන බවත් පාර්ලිමේන්තු මන්ත්‍රී නාමල් රාජපක්‍ෂ මහතා අද (7) පැවසුවා.

ජනාධිපති අපේක්‍ෂකත්වයට පත්වීමෙන් පසුව ඒ මහතා එසේ පවසා සිටියා.

ජනාධිපතිවරණයේදී සිය වගකීම බවට පත්වූයේ ‘සූට්’ ගැළපෛන කෙනකුට මසා දීම බවත් එහෙත් ඇඳුම බලෙන් ඇන්ඳවිය නොහැකි බවත් නාමල් රාජපක්‍ෂ මහතා සඳහන් කළා.

මෙවර ජනාධිපතිවරණයේදී ශ්‍රී ලංකා පොදුජන පෙරමුණ පළමු බලවේගය බවට පත්වන බව ද නාමල් රාජපක්‍ෂ මහතා වැඩි දුරටත් පැවසුවා.

ජන අරගල සන්ධානයේ ඡන්ද ලකුණ මෙන්න

ජන අරගල සන්ධානය ලෙස මීලඟ ජනාධිපතිවරණයට නුවන් බෝපගේ සහෝදරයා ඉදිරිපත් කරන ඡන්ද ලකුණ අද (අගෝස්තු 7) කොළඹ මහජන පුස්තකාලයේදී අනාවරණය කරනු ලැබුවා. 

ඒ අනුව නුවන් බෝපගේ සහෝදරයා ඉදිරිපත් වන්නේ "කුඩය" ලකුණෙන් බව ප්‍රකාශයට පත් කළා.

නීති සිසුන් පිරිසක් ජනපති හමු වෙයි

 

ජනාධිපති රනිල් වික්‍රමසිංහ මහතා සහ ශ්‍රී ලංකා විවෘත විශ්වවිද්‍යාලයේ නීතිවේදී උපාධි අපේක්ෂක සිසුන් පිරිසක් අතර හමුවක් ඊයේ (06) ජනාධිපති කාර්යාලයේදී සිදුවුණා.

ජනාධිපති රනිල් වික්‍රමසිංහ මහතාගේ සංකල්පයකට අනුව පාසල් හා විශ්වවිද්‍යාල සිසුන්ට ජනාධිපති ලේකම් කාර්යාලය, ජනාධිපති මන්දිරය, වරාය නගරය, මහබැංකුව, පාර්ලිමේන්තුව ඇතුළු කොළඹ අවට අධ්‍යාපනික වටිනාකමක් ඇති සුවිශේෂ ස්ථාන නැරඹීම සඳහා අවස්ථාව උදා කර දී තිබෙනවා.

ඒ අනුව ශ්‍රී ලංකා විවෘත විශ්වවිද්‍යාලයේ නීතිවේදී උපාධි අපේකෂක සිසුන් 280ක් පමණ ඊයේ  (06) එම ක්ෂේත්‍ර චාරිකාවට එක්ව සිටි අතර ඔවුන් ජනාධිපති කාර්යාලය වෙත පැමිණි අවස්ථාවේ ජනාධිපති රනිල් වික්‍රමසිංහ මහතා මුණ ගැසීමට අවස්ථාව සළසා දෙන ලෙස කළ ඉල්ලීමට අනුව  සිසුන් අතරට පැමිණි ජනාධිපතිවරයා ඔවුන් සමඟ සුහද කථා බහකට එක් වුණා.

ඔවුන්ගේ අධ්‍යාපන කටයුතු පිළිබඳව මෙහිදී විමසා බැලු ජනාධිපතිවරයා ව්‍යවස්ථාදායකය, විධායකය සහ අධිකරණය පිළිබඳ සිසුන් ඉදිරිපත් කළ ගැටලුවල‍ට ද පිළිතුරු ලබා දෙමින් ඒ පිළිබඳව ඔවුන්ව දැනුවත් කිරීමට ද කටයුතු කළා.

අනතුරුව ජනාධිපතිවරයා සිසුන් සමඟ සමූහ ඡායාරූපයකටද එක්වුණා.

ජනාධිපති ලේකම් සමන් ඒකනායක, ජනාධිපති නීති උපදේශක බිම්බා තිලකරත්න, ජනාධිපති ලේකම් කාර්යාලයේ සහකාර අධ්‍යක්ෂ මේජර් නදීක දංගොල්ල යන මහත්ම මහත්මීන් ද  මෙම අවස්ථාවට එක්ව සිටියා.